Xarici Tələbələrlə İş Üzrə Dekanlıq

Qəbul Qaydaları

Qəbul qaydaları və tələb olunan sənədlər.

Universitetə qəbul Azərbaycan Respublikası Nazirlər Kabinetinin 01 may  2015-ci il tarixli 125 saylı qərarı ilə təsdiq olunmuş “Azərbaycan Respublikası vətəndaşlarının xarici ölkələrdə, əcnəbilərin  və  vətəndaşlığı olmayan şəxslərin Azərbaycan Respublikasında təhsil alması Qaydaları”na  uyğun aparılır.

Əcnəbi vətəndaşlar Naxçıvan Dövlət Universitetində təhsil almaq üçün tələb olunan sənədləri elektron formada portal.edu.az veb səhifəsi üzərindən  təqdim etməlidirlər. Sənədlərə müvafiq komissiya tərəfindən baxıldıqdan sonra namizədlər üz-üzə müsahibəyə dəvət edilir.

Viza tələb olunan ölkələrdən  müraciət edən namizədlər üçün isə müsahibə online formada aparıla bilər

Müsahibənin keçirilmə yeri və vaxtı Universitet tərəfindən müəyyən edilir və bu barədə məlumatları özündə əks etdirən qrafik və namizədin ad,soyad, və ata adı müsahibəyə azı 3 gün qalmış www.ndu.ed.az saytına yerləşdirilir, yaxud portal və e-mail üzərindən məktub göndərilir.

Namizəd şəxsiyyətini təsdiq edən sənədi və ya qanunla müəyyən edilmiş qaydada ona bərabər tutulan sənədi təqdim etməklə, müsahibədə iştirak edir.

Hər namizədə 15 ( on beş) dəqiqə vaxt ayrılır.

Müsahibənin nəticəsinə dair  namizədin e-mail ünvanına arayış göndərilir.

  Qiymətləndirmə meyarları:

Dil bilikləri

Bilik səviyyəsi- (ixtisasa dair nəzəri biliklər, müsahibə proqramı üzrə ümumi bilikləri, informasiya texnologiyaları üzrə biliklər)

Qəbul üçün tələb olunan sənədlər:

• Bitirdiyi təhsil pilləsi üzrə attestat və ya diplom;
• keçdiyi fənlər və həmin fənlərdən aldıqları qiymətləri göstərən təhsil haqqında sənədin (sənədlərin) notarial təsdiq olunmuş surəti (surətləri);
• sağlamlıq və QİÇS haqqında arayışlar;
• məhkumluq haqqında arayış
• pasport pasportun surəti,
• tərcümeyi-hal;
• 3×4 ölçüdə 8 ədəd fotoşəkil.

Qeyd:

• Azərbaycan Respublikasından kənarda bakalavr dərəcəsi almış əcnəbi tələbə magistraturada təhsil almaq üçün sənədlərini təqdim etməzdən əvvəl diplomunun ekvivalentliyini Azərbaycan Respublikası Təhsil Nazirliyində təsdiq etdirməlidir. Bundan sonra təsdiq olunmuş diplomunu və notarial qaydada təsdiq olunmuş surətini bakalavr pilləsinə qəbul olunmaq üçün tələb olunan digər sənədlərlə birlikdə təqdim etməlidir.

İxtisaslar

Universitetdə əcnəbi vətəndaşların təhsili ödənişli əsaslarla həyata keçirilir. Təhsil haqqı  təhsilin pilləsindən, formasından  və ixtisaslardan asılı olaraq fərqlənir.

Qeyd №1: Əcnəbi doktorantlar(fəlsəfə və elmlər doktorluğu üzrə) üçün illik təhsil haqqı məbləği 2500 AZN müəyyənləşdirilir.

Qeyd №2: Rezidentura təhsil səviyyəsi üzrə təhsil alan əcnəbi tələbələrin illik təhsil haqqı məbləği 6000 AZN müəyyənləşdirilir.

Qeyd №3: Hər bir ixtisasın hazırlıq dinləyiciləri üçün ödəniş haqqı müvafiq ixtisasın təhsil haqqı məbləği ilə eyni müəyyənləşdirilir.

Qeyd №4: Qeyd olunan təhsil haqqı məbləğləri 1 mart 2023-cü ildən sonrakı dövr üçün universitetə qəbul olunan hazırlıq dinləyiciləri və əcnəbi tələbələr ilə üçün nəzərdə tutulub.

Naxçıvan Dövlət Universiteti ilə əcnəbi tələbə arasında ödənişli təhsil almaq haqqında

MÜQAVİLƏ NÜMUNƏSİ

 

Naxçıvan şəhəri                                                                                       “___”____________

 

Bundan sonra Universitet adlandırılacaq “Naxçıvan Dövlət Universiteti” bir tərəf və “əcnəbi tələbə” adlandırılacaq _________________________ digər tərəf aşağıdakı məzmunda Müqavilə bağladılar.

 

1. Müqavilənin predmeti

 

Naxçıvan Dövlət Universiteti ödənişli əsaslarla əcnəbi tələbəyə Azərbaycan Respublikasının dövlət standartlarına cavab verən təhsil proqramları əsasında ________təhsil səviyyəsinə uyğun ________________ ixtisası üzrə təhsil verməyi, əcnəbi tələbə isə seçdiyi ixtisas üzrə dövlət standartlarına uyğun təhsil almağı, hər tədris ili üçün ___ manat məbləğində təhsil haqqının Universitetə ödənilməsini öhdəsinə götürür.

 

2. Tərəflərin vəzifələri

 

2.1. Universitet:

 

2.1.1. əcnəbi tələbə tədris ili başlananadək illik təhsil haqqının azı 50 faizini təhsil müəssisəsinin hesabına köçürdükdən sonra onun Universitetə qəbulu haqqında əmr verir;

 

2.1.2. tədrisin dövlət təhsil standartlarına uyğun olaraq, ayrı-ayrı ixtisaslar üzrə hazırlanmış təhsil proqramları ilə müəyyən olunmuş kompetensiyalara (səriştələrə) uyğun mütəxəssis hazırlığını təmin edir;

 

2.1.3. əcnəbi tələbəyə ödənişli əsaslarla təhsil alan Azərbaycan Respublikasının vətəndaşları üçün müəyyən olunmuş hüquq və təminatlardan istifadə etmək imkanı yaradır;

2.1.4. əcnəbi tələbəni  təhsil  prosesi  və  daxili  intizam qaydaları ilə tanış edir və ona hüquq və vəzifələrini izah edir;

2.1.5. əcnəbi tələbə təhsilini uğurla başa vurduqdan sonra ona təhsil haqqında dövlət nümunəli sənəd verir.

 

 

2.2. Əcnəbi tələbə:

 

2.2.1. seçdiyi ixtisas üzrə tədris planı əsasında təhsil almaqla, tələb olunan kreditləri toplayır;

 

2.2.2. təhsil haqqını illik əsaslarla ____ tarixədək universitetin bank hesabına ödəyir;

 

2.2.3. Universitetin daxili intizam qaydalarına riayət edir.

 

2.2.4. Universitetə Azərbaycan Respublikasının təhsil müəssisələrinə əyani təhsilalma formasında qəbulu rəsmiləşdirildiyi tarixdən 90 (doxsan) gün müddətində Azərbaycan Respublikasının ərazisində yaşamalarını təsdiq edən sənədin surətini Universitetə təqdim edir.

 

3. Müqavilənin əlavə şərtləri

 

3.1. Universitet aşağıdakı hallarda əcnəbi tələbə ilə bağlanılmış bu Müqaviləni ləğv etmək hüququna malikdir:

 

3.1.1. daxili intizam qaydaları ilə qadağan edilmiş hallara yol verdikdə;

 

3.1.2. Müqavilə ilə müəyyənləşdirilmiş müddətdə təhsil haqqı ödənilmədikdə;

 

3.1.3. barəsində azadlıqdan məhrumetmə ilə bağlı məhkəmə qərarı və ya Azərbaycan Respublikasının hüdudlarından kənara çıxarma haqqında qərar olduqda.

3.1.4. Azərbaycan Respublikasının ərazisində yaşamalarını təsdiq edən sənədin surətini bu Müqavilənin 2.2.4-cü yarımbəndi ilə müəyyən edilmiş müddətdə təhsil müəssisəsinə təqdim etmədikdə.

3.2. Əcnəbi tələbə hər hansı səbəbdən təhsilini davam etdirə bilmədiyi və ya istəmədiyi halda, habelə yuxarıda göstərilən əsaslara görə Universitetdən xaric olunduqda, ödənilmiş təhsil haqqı geri qaytarılmır.

3.3. Müqavilənin şərtlərinin pozulması ilə bağlı tərəflər arasında yaranan mübahisələrə Azərbaycan Respublikasının məhkəmələrində baxılır.

3.4. Bu Müqavilə Azərbaycan dilində olmaqla, 2 eyni nüsxədə tərtib edilmiş, bir nüsxəsi Universitetdə əcnəbi tələbənin şəxsi işində, digər nüsxəsi isə əcnəbi tələbənin özündə saxlanılmışdır.

 

Əcnəbi tələbənin adı, soyadı və atasının adı: _____________________________

 İmza: ______________

 Ünvan: ________________

 

Rektor:

 İmza: ______________

 Ünvan: Azərbaycan Respublikası, Naxçıvan şəhəri, Universitet şəhərciyi, AZ7012

 

VÖEN: 0200150211

Tel: (+99436) 544-08-61

Faks: (+99436) 545-72-88

E-mail: info@ndu.edu.az, admin@ndu.edu.az

Əlaqə

 

Ünvan:		Naxçıvan şəhəri, Naxçıvan Dövlət Universiteti Universitet şəhərciyi, AZ 7012
Tel.:		(+99436) 544-08-61;    Daxili: 2280
E-poçt:		info@ndu.edu.az iro@ndu.edu.az xtd@ndu.edu.az